MUSOMA DC YAKAGUA MRADI WA UCHIMBAJI NA UCHENJUAJI DHAHABU WA JEMA PARTNERS.

Posted on: September 16th, 2018

Halmashauri ya Wilaya ya Musoma imetembelea na kukagua athari za  kimazingira na kijamii zinazoweza kuletwa na  mradi wa uchimbaji na uchenjuaji (processing) madini  aina  ya dhahabu wa Jema  Partners.

Zoezi  hilo la  ukaguzi  wa mradi  huo unaotumia mfumo wa  kutenganisha dhahabu kwa kutumia Cyanide  (Vat  leaching) katika hatua ya uchenjuaji (Processing) uliopo katika Kijiji cha Kaburabura, Kata ya Bugoji limefanyika jana Jumanne 11, Septemba 2018.

Mradi huo uliopo katika hatua za mwisho za kufunguliwa ni moja kati ya miradi ya uchimbaji wa madini aina ya dhahabu iliyopo katika Halmashauri ya Wilaya ya Musoma.

Akizungumza wakati wa zoezi hilo Afisa Afya na Mazingira wa Halmashauri hiyo Ndg. Mwizarubi E. Nyaindi alimtaka mwekezaji wa mradi huo kuhakikisha anakamilisha vitu vilivyobaki kabla ya kuufungua mradi huo.

"Tumeangalia athari za kimazingira zinazoweza kuletwa na mradi huu, tumeona kwa kiasi kikubwa mwekezaji ameweza kudhibiti hilo" alisema Nyaindi.

"Kwa kiasi kikubwa mwekezaji amekamilisha   matakwa ya kuanzisha mradi, kuna vitu vichache inabidi akamilishe kabla ya kuufungua mradi huu na akishakamilisha hivyo tutarudi tena kuja kukagua" alisema Nyaindi.

Mwisho Ndugu Nyaindi alimtaka Mwekezaji huyo kufika katika ofisi ya Mkurugenzi wa Halmashauri hiyo ili kuweza kupata ushauri, maelekezo na  taratibu  za ulipaji kodi  na maswala ya kitaalamu juu ya uendeshaji wa mradi huo.

Imetolewa na

Kitengo cha habari na uhusiano

Halmashauri ya Wilaya ya Musoma