KAMATI YA MIKOPO NGAZI YA HALMASHAURI YAANZA TATHMINI YA MAOMBI YA MIKOPO YA TSH 700 MILIONI KWA VIKUNDI VYA VIJANA, WANAWAKE NA WATU WENYE ULEMAVU

Posted on: November 19th, 2025

Kamati ya Mikopo ngazi ya Halmashauri imeanza mchakato wa kufanya tathmini ya maombi ya mikopo yaliyowasilishwa na vikundi vya vijana, wanawake na watu wenye ulemavu kwa kipindi cha Julai hadi Septemba 2025. Jumla ya fedha zilizowasilishwa kwa ajili ya kuombwa mikopo ni Tsh 700,827,000/= ambazo zinatokana na asilimia 10 ya mapato ya ndani ya Halmashauri.

Maombi yaliyowasilishwa yanagawanyika kama ifuatavyo:

• Vikundi vya Wanawake: Tsh 171,505,000
• Vikundi vya Vijana: Tsh 496,822,000
• Vikundi vya Watu Wenye Ulemavu: Tsh 32,500,000

Katika zoezi hilo la tathmini, Kamati inalenga kuhakikisha kuwa kiasi cha fedha kilichoombwa kinaendana na miradi iliyowasilishwa na kuwa na uhalisia. Aidha, kamati inafanya uhakiki wa uhai wa vikundi, wanachama wake, uwezo wao wa kutekeleza miradi pamoja na kupima uelewa wao kuhusu shughuli wanazofanya na malengo ya mikopo wanayoomba.

Zoezi hilo ni hatua muhimu katika kuhakikisha kuwa mikopo inayotolewa inalenga kuchochea uchumi wa vikundi husika, kuongeza kipato cha wanachama na kuleta maendeleo chanya katika jamii kupitia matumizi sahihi ya fedha za mikopo.

Halmashauri inaendelea kusimamia utekelezaji wa sera ya utoaji wa mikopo ya asilimia 10 ili kuwezesha makundi maalum kiuchumi na kuwapatia fursa ya kupanua shughuli zao za uzalishaji.